أنتـــــي

الاختيار

مارد بيضحك عـ البشر بالليل

عازف ربابة بيغني حكاية أبوزيد

شاعر ولص وابن أصل

وفيلسوف..

كداب كبير ومغنواتى

حداد يسن الخوف مع السكاكين

فارس بيمسك سيف خشب

وقليل أدب

وأبن كلب واطى

الاختيار ..شوكة حلم بتغز غز

وضعيف حزين وقت الربيع بالبظبط

أذى

كل الأذى

تفاحة واقعه من جنينة لوحدها

ومغناطيس بيشد عـ الجنبين

الاختيار

سما زرقه لعطشان فى عز الصيف

الاختيار مش ضيف

دا أمير وعازف ناي

الاختيار ..بكاي وعيل

راجل عجوز وبدقن

وفرخه بيضه من بتوع الحقن

 الاختيار بنوته راسمه فـ عينيها شعر نزار

راهب بيسكن غار

شعره مابين الجنة

وبين النار

كوكب حياة وبعيد

وأنا مـ اخترتكيش.